إجازة ست البيت.. مش مستحيلة

By سهام حسن on يونيو 13, 2017 in صحة الأم with No Comments

إجازة ست البيت.. مش مستحيلة

أ. ريهام الصواف
رئيس قسم المرأة بجريدة فيتو
خبيرة العلاقات الانسانية والاسرية

ستات كتير لسان حالها بيقول؛ هو انا مكتوب عليا اشتغل طول الوقت، وهو بيرجع البيت ينام ويتخدم،
حتى الولاد بيرجعو من المدرسة ويخلصو واجباتهم يرتاحوا وبرضه يتخدمو.. امتى ارتاح.. امتى اخد اجازة بجد..

 

الكل بياخد إجازة حقيقية، إلا ست البيت، حتى يوم الإجازة برضه لازم تشتغل وتعمل الاكل، وتنظف البيت، وتخدم زوجها وأولادها،
وده بيمثل ضغط عليها، ومع الوقت بتفقد أعصابها، واهتمامها بحاجات كتير حواليها، وبيصيبها الإحباط واليأس، ويتتلخبط حياتها،
وبتتوتر، ومهما كان يومها طويل، ومسئولياتها قليلة بتحس أنها طول الوقت مشغولة، ويومها مشحون ومضغوطة، ومش بتلاقي وقت لنفسها.

 

تعرفي سر روقان زوجك إيه، الوقت اللي بيتفرج فيه على المباريات والبرامج الرياضية، ولعبه مع اصحابة “البلاي ستيشن”،
كل ده بيفرغ طاقته السلبية أول بأول، وبيجدد نشاطه، ويحسن مزاجه، فيقدر يتحمل ضغوط جديدة.

 

 وولادك كمان عايشين حياتهم، ومستمتعين لأنهم بيلعبوا، بيتنططوا، بيخرجو أي حاجة تعباهم أول بأول،
بيجددوا نشاطهم طول الوقت.

 

أكيد عقلك بيقول “وهجيب الوقت منين”، ما بين خدمة الزوج والولاد، وتنظيف البيت، وعمل الأكل، فين الوقت
لتجديد النشاط، ولا لممارسة أي هواية.

 

السر كله في دماغك، لو نظمتيها، ونظمتي وقتك، هتلاقي وقت لكل حاجة، حتى أنك تاخدي إجازة حقيقية.. ازاي؟؟!!

 

هقولك..

بالورقة والقلم، أو حتى على التابلت، اكتبي كل المهام المطلوبة منك، قبل نومك، وابدئي في ترتيب تنفيذك للمهام،
من الأهم للأقل أهمية، حسب الأولويات والاحتياجات، على سبيل المثال، وضع الغسيل في الغسالة، إخراج أكل اليوم من الفريزر،
تنظيف البيت، وهكذا، ولا تنسي وضع بند هوايتك أو وقت لراحتك وسط المهام.

 

حاولي قدر المستطاع الالتزام بقائمة مهامك، وخاصة وقتك الخاص، ولتجعليه في وسط اليوم، لتكملي يومك، ومعنوياتك مرتفعة، ومبسوطة.

 

يوم ورا يوم مع التزامك بجدول مهامك، هروبك لهوايتك، ولو ساعة في اليوم، الضغوط على عقلك هتقل، حالتك النفسية هتتحسن، وعقلك هيتنظم.

 

وعند الشعور بكل المشاعر الجميلة دي، حددي يوم لإجازتك الأسبوعية، وابدئي في الترتيب له، بالنسبة للأكل؛ إما تزودي في
يوم من أيام الأسبوع أكل ليوم إجازتك، أو أنك تشتري أكل جاهز، واتفقي مع زوجك وولادك أنهم يساعدوكي في الحصول على إجازة،
إما بأنكم تخرجو تقضوا اليوم مع بعض بره، أو في حال قضائكم اليوم في البيت، يحاولو يقللو من طلباتهم، ويخدمو نفسهم،
او على الأقل يساعدوكي في إنجاز مهامك سريعا، ومن ناحيتك حاولي قدر المستطاع إنجاز ما يمكن من مهامك في اليوم السابق.

المهم لا تتنازلي عن يوم إجازتك، ولا ممارسة هوايتك.

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

top